കോവിലന്റെയും നന്തനാരുടെയും പാറപ്പുറത്തിൻ്റെയും തിളങ്ങുന്ന പാരമ്പര്യത്തിൽ പട്ടാളക്കഥകൾക്കിതാ പ്രകാശമാനമായ ഒരു പെൺഭാഷ്യം. ഹിമാലയത്തിൻ്റെ നിഗൂഢവും അപ്രാപ്യവുമായ പർവ്വതനിരകളിലൂടെ പർവ്വതാരോഹകയായ ഒരു പട്ടാളക്കാരി തേടിപ്പോവുകയാണ്. ഹിമവാതങ്ങളുടെ ചുഴിച്ചുറ്റലിൽ എന്നോ മറഞ്ഞുപോയ പ്രിയപ്പെട്ട ഒരാൾക്കുവേണ്ടിയുള്ള അന്വേഷണം. സമാന്തരമായി ശരീരത്തിൻ്റെയും ആത്മാവിന്റെയും അന്വേഷണങ്ങളുമുണ്ട്. കൊടുംശൈത്യത്തെ മഞ്ഞുപോലെ ഉരുക്കുന്ന പ്രണയമുണ്ട്. ബുദ്ധിസത്തിൻ്റെ സുഗന്ധവും ടിബറ്റൻ അഭയാർത്ഥിത്വത്തിൻ്റെ സങ്കടങ്ങളുമുണ്ട്. അനവധി അടരുകളിൽ പടർന്നുകിടക്കുന്ന ആഖ്യാനം. ചരിത്രവും മിത്തുകളും അന്വേഷണവും കാത്തിരിപ്പും സാഹസികതയും മനുഷ്യബന്ധങ്ങളുടെ തീർപ്പില്ലായ്‌മകളും ഒന്നുചേർന്ന് ഒരു പ്രവാഹമായി തീരുന്ന ഈ നോവൽ അസാധാരണമായ വായനാനുഭവമാണ്.
Reviews
There are no reviews yet.